:: Do Din Ke Liye.. ලෝ අම්බලමේ.. ::






හරියටම මාසෙකට පස්සේ තමයි ඔන්න අළුත් ලිපියක් අරගෙන එන්නේ.. රජරට පුත්‍රයා මුලින්ම සමාව ඉල්ලා සිටිනවා පමාවට..

ඉතින් පහුගිය කාලේ රාජකාරී වැඩ කෝටියක් තිබුනා.. ඒ අතරෙදි අපේ බ්ලොග් සහෘද‍යන් කීපදෙනෙක්ම මුණගැහෙන්නත් වෙලාවක් කලාවක් ලැබුනා.. ඒ අතරින් අපේ නොදරුවා එක්ක සෑහෙන ලොකු චැට් එකක් දාන්න ලැබුනා රංගි අක්කලාගේ ගෙදර රට බීම බෝතල් බාගයක් හිස් කරන ගමන්ම.. මේ චැට් එකට නොදරුවාගේ බිරියයි, අපේ ආගන්තුකයායි, ඇබ්නොර්මල් මලීයායි, පිස්සු අසංකාත් සෙට් වුනා.. විශ්ව සංගීත සාගරයම කළඹලා වොඩ්කා වලට සැන්ඩි කරලා බිව්වා කිව්වොත් ලාවට වගේ හරි.. :P ඉතින් නොදරුවා කියන්නේ ම‍ගේ මේ බ්ලොගේ හොඳ ෆෑන් කෙනෙක්.. ෆෑන් කෙනෙක් නෙමෙයි ඒ.සී. මැෂින් කෙනෙක්.. :D අද දාන මේ ලිපිය නොදරුවා වෙනුවෙන් දාන්නේ ඔන්න...

1951 තිරගත වුනා "බාදල්" (Badal) කියලා චිත්‍රපටියක්.. මධුභාලා එක්ක ප්‍රේම්නාත් තමයි ‍ප්‍රධාන රංගන යුවල වුනේ.. අමියා චක්‍රබෝර්ති තිර රචනය කරලා අධ්‍යක්ෂණය කරපු මේ චිත්‍රපටියේ කථාව එංගලන්තේ රොබින් හුඩ්ගේ කථාවේ ඉන්දියානු පිටපත කිව්වොත් හරි.. හරිම ලස්සන ගීත කීපයක් මේකේ අඩංගු වුනා.. ඒ අතරින් මෙන්න මේ ගීතය ඒ කාලේ සෑහෙන ජනප්‍රිය වුනා..

"දෝ දින් කේ ලියේ මෙහෙමාන් යහා.. මාලූම් නහී මන්සිල් හේ කහා.. "

ශෛලේන්ද්‍ර ලියපු ලස්සනම ලස්සන පද වලට ශංකර්-ජයකිෂන්ගේ සංගීතය මුහු කරලා ලතා මංගේෂ්කාර්ගේ මියුරු හඬින් ගැයෙන මේ ගීතය ඔන්න පල්ලෙහායින් අහන්න බලන්න විඳින්න පුළුවන්..



ඇත්තටම මම මේ හින්දි සින්දුව මෑතකදි තමයි අහුවේ.. මුලින්ම අහලා තිබුනේ මේ ගීතයේ තනුවට ගැයුනු සිංහල ගීතය.. මම සෑහෙන කාලෙක ඉඳලා මේ සිංහල ගීතයට ආසයි.. මං හිතං හිටියේ මේක ඔරිජිනල් සිංහල සින්දුවක් කියලා.. කොහෙද.. බලද්දි මේකත් කොපියක් නෙව.. හරි හරි දැන් බලමුකෝ මොකක්ද මේ සිංහල "එක" කියලා..

ලෝ අම්බලමේ ඉඳලා යනවා..
නිසි පාර සොයා ආගන්තුකයා..
දෙයි මාන බලා කරුමේ පහරා..
මේ ජීවිතයේ කොයි ස්ථීරතා..

පිණි බින්දු වගේ බිඳි යාවී සැනේ..
මේ නිසරු කයේ අපි ආලේ කලා..
කරුමේ කලේ මේ කිමදෝ අනේ අහෝ.. //
මේ මාව දමාලා යන්නේ කොහේ..

ගිණි දැල්ල නගින්නා සොහොන පුරා..
දුම් කන්ද නගී ආකාසේ කරා..
ගිණි දැල්වීලා ආවේ හර්දේ පලා..
පව්කාර මගේ පව් පලදේ අහෝ..
මේ ජීවිත‍යේ කොයි ස්ථිරතා..

සංසාර දුකෙන් මිරිකීම තමා..
ලෝකේහී සොබාදහමේ නියමා..
මරණේට ආ දා යායුතුයි ඔව්..
මරණේට ආ දා යායුතුයි..
ධර්මේ නමුත් සැනසෙන්නේ කෙසේ..

ලෝ අම්බලමේ ඉඳලා යනවා..
නිසි පාර සොයා ආගන්තුකයා..

මේ ගීතයේ පද ටික ඔක්කොම මම මුලින්ම කියව්වේ අපේ ලොකු නැන්දාගේ දිනපොතේ ලියලා තිබිලා.. නැන්දාගේ ජීවිත කථාව ලියාගෙන යන ගමන් මැද මේ පද ලියලා තිබුනා.. මට අවුරුදු 12ක් විතර ඇති එතකොට.. මට පුදුම විදිහට ආස හිතුනා මේ පද වලට.. අදටත් මම මේ සින්දුවට ආසයි..

1957 තිරගත වුන "ජීවිත සටන" චිත්‍රපටියේ තමයි මේ ගීතය අඩංගු වෙලා තිබුනේ.. ශාන්ති කුමාර් එක්ක සීතා ජයවර්ධන ප්‍රධාන චරිත රඟපෑ මේ චිත්‍රපටිය අධ්‍යක්ෂණය කරලා තියෙන්නෙත් ශාන්ති කුමාර්මයි.. මේ ලස්සන ගීතය ගායනා කලේ දකුණු ඉන්දියාවෙන් පැමිණි "ජික්කි" කියන ගායන ශිල්පිණිය..

ඉතින් පස්සේ කාලෙක මේ සින්දුව හොයද්දී මට හම්බුනා මුල් කොපියම රජරට සේවේ කාලයක් වැඩ කරද්දී.. පස්සේ කාලෙක මේක නන්දා මාලනී මහත්මිය හරි අපූරුවට ගායනා කරලා තිබ්බා කිසිම හානියක් නොකරම.. ඔන්න ඒ ගීතය තියෙනවා පල්ලෙහායින් බාගන්න.. තව යුටියුබ් විඩියෝ එකක් තියෙනවා ඔය රියැලටි තරඟෙකදි ගායනා කරපු.. නමුත් ඒක embed කරලා දාන්න බෑ.. කැමති නම් ගිහින්ම බලන්න ලින්ක් එක තියෙනවා ඔන්න..

අදට එච්චරයි.. තව සින්දු ටිකක් අරං පුළුවං ඉක්මනට එන්නම් ඕං.. බායි කිව්වා..

ලෝ අම්බලමේ ඉඳලා යනවා - නන්දා මාලනී

ලෝ අම්බලමේ ඉඳලා යනවා - යූටියුබ් වීඩියෝ එක
උදාර මදුෂංක
Udara || උදාර ධර්මසේන

6 comments:

වැම්පයර් said...
June 20, 2010 at 8:37 AM

මැක්සා! ඈස් ඕල්වේස්!

Anonymous said...
June 21, 2010 at 12:57 PM

උදාර මල්ලියේ...

මං අහම්ඹෙන් උඹේ මේ සුන්දර ඉසව්වට ගොඩ වැදුනෙ...තිසා ගොයියගෙ හද ගී පොතට ගොඩවැදුන ගමන්...උන්දැ මේ දවස්වල නිවාඩු පාඩුවේ නෙව..
ඇත්තටම උඹ මේ කරණ සේවයෙ අගය කියලා නිමකරන්න බැහැ...අපේ පරණ සිංදුවල අල ගිය මුල ගිය තැන් හොයලා අපිට කියා දෙනවට පිං අයිති වෙන්න ඕනෑ..
මමත් ආස කරණ දෙයක් තමයි පරණ හින්දි ගීත වලට සවන් දීම ..ඒ සන්දියේදී වෑර්ලස් එකේ හවස තුනටද කොහෙද විකාශනය වන හින්දි ගී වැඩ සටහන නම් වරද්දන්නෙම නැහැ...අදට වුනත් ඒවාගෙ වැඩ සටහන් හොය හොයා රසවිඳිනවා..
සමහර හින්දි හෝ දෙමළ තනුවලට ගැයුනු සිංහල ගීත එහි මුල් ගීතයට(හින්දි,දමිළ )වඩා මධුර වූ අවස්ථාත් එමට තියෙනවා නෙවැ..
දැන් මේ ඉහතින් සඳහන් කල ගීතයම අහන්නකෝ...
ඉතින් ඉඩහසර තියෙන වෙලාවකට ආයෙත් ඇවිල්ලා සටහනක් තියලා යන්නම්....ගීතයේ මතකය අලුත් කරගෙනම තමයි යන්නේ..

මගෙන් සුභ පැතුම්...

"ලෝ අම්බලමේ ඉඳලා යනවා..
නිසි පාර සොයා ආගන්තුකයා.."


සුලා..

Ansh Lucky Sri Jay said...
June 22, 2010 at 12:06 PM

ඔන්න ගිය සැරේ සින්දුවට මම දාපු කමෙන්ට් එක සනාත වුණා නේද?? හරියටම මාසෙකට පස්සෙ නෙව ඇවිත් තියෙන්නෙ..
අදත් සින්දුව සුපිරි..!

Udara || උදාර මදුෂංක said...
June 22, 2010 at 11:44 PM

වැම්පයර්, සුලාක්කා, අසංකා,

හප්පේ ළමයිනේ... ඕගොල්ලෝ දාන මේ කමෙන්ටු තමයි ඉතින් මගේ තෙල්.. ඉන්ධන.. මේවා දැක්කාම ඉතින් කාටද නොලියා ඉන්න හිතෙන්නේ.. හැමදෙනාම දෙන දිරියට පින් කිව්වා.. දිගටම එන්න... බලන්න... :)

මින්දද said...
June 25, 2010 at 6:46 PM

මේ සිංදුවත් නියමයි මචං...

CHARITH GUNARATNA said...
August 25, 2012 at 8:13 PM

Thanks !! great !!

Post a Comment

වචනයකින් දෙකකින්වත් දිරිය දෙන්න...