:: Bago main bahar hain.. සඳට අහස ආදරේදෝ.. ::

මුලින්ම සමාව ඉල්ලනවා මේ අවුරුද්දේ මාස 3කුත් දවස් 3කුත් ගතවෙලා එකම ලිපියක් වත් ලියා ගන්න බැරිවුන එකට... පහුගිය ටිකේ අධික රාජකාරී ගොඩකුත් ක්‍රිකට් ලෝක කුසලානය සම්බන්ධයෙන් ව්‍යාපෘතියකටත් අතගහන්න වුන නිසා මේ පැත්ත බලන්නවත් බැරි වුනා.. ඒත් එහේ මෙහේ ඇවිදිද්දී ලස්සන ගීත කීපයක් හොයාගන්න අමතක කලේ නෑ.. ඉතින් ඔන්න අදත් ගෙනාවා ලස්සනම ලස්සන හින්දි ගීතයක් සහ එහි පදරුතට සමානව නිර්මාණය වුන සිංහල ගීතයකුත්... වෙනදා හින්දි ගීතයේ තනුවට අනුව ගැයුණු සිංහල ගීතය ගෙනාවත් අද ඒ සම්ප්‍රදාය ටිකක් විතර වෙනස් කරන්න හිතුනා අවුරුද්දේ මුල්ම ලිපිය හින්දාම.. එහෙනම් බලමුකෝ මොකක්ද මේ ලස්සන සින්දුව කියලා...

බාගෝ මේ බහාර් හේ.. හේ..
කලියෝ පේ නිකාර් හේ.. හේ..
ඕ.. තුම්කෝ මුජ්සේ ප්යාර් හේ.. නා නා නා නා...

(වසන්තය එළඹිලා නේද ? ඔව්..
මල් පොහොට්ටු පූදිනවා නේද ? ඔව්..
එහෙනම්.. ඔයා මට ආදරෙයි නේද ? නෑ නෑ නෑ නෑ...)

1969 තිරගතවුන ආරාධනා චිත්‍රපටියේ තමයි මේ ගීතය අඩංගු වෙලා තිබුනේ.. කොයි කාටත් මතක ඇති ආරාධනා චිත්‍රපටිය නම් නේද ? ඒ වුනාට කීයෙන් කීදෙනාද දන්නේ ඒක ඉංග්‍රීසි චිත්‍රපටියක් කොපියක් කියලා.. 1946 Mitchell Leisen අධ්‍යක්ෂණය කල ඇමෙරිකාවේ තිරගත වුන To Each His Own චිත්‍රපටිය තමයි ආරාධනා චිත්‍රපටියේ ඔරිජිනල් එක කිව්වෝත් නිවැරදි.. ඉන්දියාවේ එහෙමත් නැත්නම් බොලිවුඩ් වල මේකේ රීමේක් එක කලේ ශක්ති සමන්තා කියන අධ්‍යක්ෂක වරයා.. එම අවුරුද්දේ ෆිල්ම්ෆෙයා සම්මාන උළෙලේ හොඳම චිත්‍රපටියට, හොඳම නිලියට, හොඳම පසුබිම් ගායකයාට හිමි සම්මාන තුනම දිනා ගන්න මේ චිත්‍රපටියට හැකියාව ලැබුනා.. ශර්මිලා ‍තාගෝර් සමග රාජේශ් ඛන්නා තමයි ප්‍රධාන චරිත වලට පණ පෙව්වේ.. අදටත් මේ දෙන්නම ජීවතුන් අතරවීම තවත් සුවිශේෂී කාරණයක්.. ඒවගේම රාජේශ් ඛන්නා ද්විත්ව රංගනයෙනුත් දායක වුනා.. මෑත කාලයේ කුච් කුච් හෝතා හේ, දිල්වාලේ දුල්හනියා ලේ ජායේන්ගේ වැනි ජනප්‍රිය චිත්‍රපටි වල මවගේ චරිතය රඟදක්වපු ෆරීඩා ජලාල් මේ චිත්‍රපටියේ පෙම්වතියකගේ චරිතයකට රඟපානවත් බලාගන්න පුළුවන්..

සම්පූර්ණ චිත්‍රපටියේම ගීත 07ක් අඩංගු වුනා.. ඒ අතරින් "මෙරේ සප්නෝකි රානි කබ් ආයේගී තූ", "රූප් තෙරා මස්තානා", "චන්දා හේ තූ" කියන ගීත අදටත් සෑහෙන ජනප්‍රියයි.. කිෂෝර් කුමාර්, මොහොමඩ් රාෆි, ලතා මංගේෂ්කාර්, ආශා බෝස්ලේ, එස්.ඩී. බර්මන් ගීත ගායනයා කලා.. සංගීත අධ්‍යක්ෂණය එස්.ඩී. බර්මන් සහ පද රචනා ආනන්ද් බක්ෂි අතිනුත් ලියැවුනා..

මේ ගීතය ගායනා කලේ කිෂෝර් කුමාර් සමග ලතා මංගේෂ්කාර් මහත්මියයි.. ඔන්න පහලින් බලාගන්න, අහන්න වගේම බාගන්න අවස්ථාවත් වෙනදා වගේම දීලා තියෙනවා..

බාගෝ මේ බහාර් හේ.. හේ..







ඉතින් අපි දැන් බලමු මේ ගීතයට සමානව තියෙන සිංහල ගීතය මොකක්ද කියලා.. ඇත්තටම මේ ගීතය හින්දි ගීයේ තේරුම දැනගෙන පසුව නිර්මාණය වුන ගීතයක්ද කියලා නිවැරදිවම තහවුරු කරන්න සාධක නැති වුනත් හින්දි ගීයේ ආකාරයටම පද ගැලපීම ඇති නිසා ඒ ආකාරයෙන් අපිට හිතන්න පුළුවන්..

සඳට අහස ආද‍රේදෝ.. හ්ම් හ්ම්..
මලට බඹරු ආ‍දරේදෝ.. හ්ම් හ්ම්..
දෙනෙතට වත ආදරේදෝ.. හ්ම් හ්ම්..
සොඳුරි‍යේ මට ආදරේදෝ.. නෑ නෑ..

ප්‍රේමකීර්ති ද අල්විස්ගේ පද සංකල්පනාවෙන් හැඩවුනු වික්ටර් රත්නායක සහ සුජාතා අත්තනායක ගායනා කරන මේ ගීතය '70 දශකයේ ඉතා ජනප්‍රිය ගීතයක් වුනා.. ගී පද රචනයේ නවමු අත්හදා බැලීමක් කරන්න ප්‍රේමකීර්ති යොමු වුනේ මේ ගිතයෙනුයි.. පහලින් තියෙන පද කීපයෙන් ඒක පැහැදිලිව ඔප්පු කරනවා..

පද සහනයි - සඳ පහනයි
පද මවනයි - මඳ පවනයි
වසර සසනතුරු - සසර වසනතුරු
අම මාදරෙයි - මම ආදරෙයි

ඒ යුගයේ මේ ගීතය කොච්චර ජනප්‍රියද කිව්වෝත් මේ ගීතය ගායනා කරන්නේ "රට්ට විත්තනායක සහ අජාතා සුත්තනායක" යැයි සමහරු විහිළු කරන්න පවා පටන් ගත්තා.. පහලින් මේ ගීතය අහන්න බාගන්න අවස්ථාව තියෙනවා..

සඳට අහස ආදරේදෝ - වික්ටර්!සුජාතා

තවත් මේ ‍වගේම ලස්සනම ලස්සන ගීත කීපයක් අරගෙන ඉක්මනින්ම එන්නම්..